Нұрбек финалда барлық боксшымыз үшін айқасады - Мырзағали Айтжанов
Бокс
Владислав Семенов
Бокстан Қазақстан құрамасының бас бапкері Мырзағали Айтжанов 80 келі салмақта өткен Нұрбек Оралбай мен Кристиан Пиналес арасындағы жекпе-жекті қорытындылады, деп хабарлайды Bassport.kz ҰОК-ге сілтеме жасап.
"Олимпиада ойындарында оңай қарсылас деген атымен жоқ. Барлығы да өте қауіпті саналады. Бүгін Нұрбекпен жұдырықтасқан доминикандық боксшы да құр емес. Ол қандасымыз Тоқтарбек Таңатқаннан бастап, мықты боксшыларды қатардан шығарды. Нұрбек бүгін біздің айтқан тапсырмамызды мүлтіксіз орындады. Оған алға бармай, қарсыласты күтіп алып, қажетті кезде соққы жұмсау керектігін айттық. Төрешілердің үш раундта да 3:2 есебін бергені туралы ештеңе айта алмаймын. Біз жеңісті бергеніне қуанып жатырмыз. Алда финалдық жекпе-жек күтуде. Нұрбек командадағы барлық боксшымыз үшін айқасады", - деді Айтжанов.
Еске салайық, Нұрбек Оралбай 80 келі салмақта Олимпиаданың финалына шықты.