ЧЛ: Григорий Бабаян “Астананың” екінші кезеңге өтуіне қатысты ойымен бөлісті
Футбол
“Астана” футбол клубының бас бапкері Григорий Бабаян УЕФА Чемпиондар лигасы бірінші іріктеу кезеңінің қарымта матчын қорытындылады, деп хабарлайды BasSport.kz тілшісі.
Елордалық клуб сырт алаңда “Динамо Тбилисиге” қарсы өткізген ойынында 2:1 есебімен жеңіске жетті. Ал Астанада өткен ойында екі команда тең тарқасқан. Осылайша, жалпы 3:2 есебімен “Астана” Чемпиондар лигасы іріктеу кезеңінің екінші айналымына шықты.
“Бірінші соғылған голға дейін екі команда тең ойнады. “Динамоның” соққан голы өз жоспарымыздан алыстатты. Алаңның орталық бөлігінде қарсыласқа көп есе жібердік, сондықтан үзілісте ойынымызды өзгертуге тура келді. Қажет кезінде гол соға білдік. Чемпиондар лигасында жеңіл ойын болмайды. Матч соңында қорғаныста көп ойнадық, өйткені қарсылас қысым көрсетті. Бүгін команданың барын салып ойнауы мен рухы көмектесті. Ойынның соңғы минуттарында жолымыз болды. Бастысы, жеңіске жеттік және келесі айналымға өттік”, - деді Григорий Бабаян матчтан кейінгі баспасөз конференциясында.
УЕФА Чемпиондар лигасы екінші іріктеу кезеңінде “Астана” Загребтің “Динамосына” қарсы ойнайды.