Қазақстан мен АҚШ: әлем чемпионатының ең жас командалары аталды
Шайбалы хоккейден топ-дивизиондағы әлем чемпионатының ең жас құрамалары аталды, деп хабарлайды BasSport.kz тілшісі.
Қазақстан мен АҚШ құрамалары - әлем біріншілігінің ең жас командалары. Қазақ хоккейшілерінің орта жасы 24.72 болса, америкалық спортшылардың орташа жасы - 24.71. Екі команда арасындағы айырмашылық сондағы 0.01 жас қана.
Ал әлем чемпионатында жасы үлкен хоккейшілерден құралған команда - Словения (29.88).
Айта кетейік, биыл ұлттық құрамамыз сапында тек Қазақстан хоккей мектебінің тәрбиеленушілері өнер көрсетеді.
Әлем біріншілігі Тампере мен Рига қалаларында өтіп жатыр. Қазақстан құрамасы “В” тобында Словения, Словакия, Чехия, Швейцария, Канада, Латвия және Норвегия командаларымен сынға түседі.
Ал бүгін Ғалым Мамбетәлиев командасы топтық кезеңдегі алғашқы ойынын Норвегияға қарсы өткізеді. Матч Астана уақытымен 19:20-да басталады. Оны BasSport.kz сайтынан және мобильді қосымшасынан (Android қолданбасынан жүктеп алу арқылы) тікелей эфирде көруге болады.