Бапкерлердің сенімін ақтауға тырысамын - Тамирлан Гайтамиров
Қазақстан ұлттық құрамасының Бірінші арна кубогына дайындығы барысында БАҚ өкілдері үшін ашық жаттығу өткізіліп, биыл командаға тұңғыш рет шақырту алған қорғаушы Тамирлан Гайтамиров bassport.kz тілшісіне сұхбат берді.
- Осыдан 3 жыл бұрын Қазақстан жастар құрамасында өнер көрсеттім және бірінші рет ұлттық команда сапына шақырту алдым. Ерекше сезім. Біз үшін маңызды турнир және өзімізді жақсы жағынан көрсетіп, жеңіске жету – басты мақсат. Бұл турнирдің мен үшін маңызы ерекше. Алдағы әлем чемпионатына шақырту алу үшін осы Бірінші арна кубогында команда үшін жанымды салып ойнап, өзімді жақсы қырымнан көрсетуім керек. Сенім артып, құрама команда сапына шақырғандары үшін бапкерлерге алғысым шексіз. Жеңіске жету үшін бар күшімді саламын.
Оған қоса, биыл алғаш рет 3х3 турнирінде ойнаймыз. Әр жаттығу сайын осы форматта ойнап көріп жүрміз. Бәрі жақсы болады деп ойлаймын.
Шайбалы хоккейден Мәскеуде өтетін Бірінші арна кубогы 15-18 желтоқсан аралығында өтіп, онда Қазақстан, Ресей және Беларусь құрамалары бақ сынайды. Қазақстан ұлттық құрамасы ертең, яғни 12 желтоқсан күні жолға аттанады. Өзге клубтардан келетін ойыншылар командаға Мәскеуде қосылатынын еске сала кетейік.