Қазақстан жастар құрамасы Даниямен жолдастық кездесу өткізеді
29 қараша күні 20 жасқа дейінгі Қазақстан жастар құрамасы Норвегияның Аскер қаласында өтетін әлем чемпионатына дайындық жұмыстарын бастады. 11-17 желтоқсан күндері өтетін әлем біріншілігі алдында ұлттық құрама Данияның жастар құрамасымен жолдастық кездесу өткізеді, деп хабарлайды bassport.kz тілшісі.
Екі құрама арасындағы жолдастық кездесу 8 желтоқсан күні өтеді деп жоспарланып отыр. Ал шайбалы хоккейден 20 жасқа дейінгі Қазақстан жастар құрамасы 3 желтоқсан күні Норвегия аттанады. Құраманың кеңейтілген құрамына 28 хоккейші - 25 алаң ойыншысы мен 3 қақпашы кіреді. Ал қорытынды бақылау матчынан кейін бапкерлер әлем чемпионатында ел намысын қорғайтын спортшылардың соңғы құрамын жариялайды.
Жастар арасындағы әлем чемпионатының І дивизионы "А" тобында Дания, Франция, Норвегия, Венгрия мен Словения елдері Қазақстанның қарсыласы болып, топ-дивизионның жолдамасын сарапқа салады.