Billie Jean King Cup: жұптық сында жолымыз болмады
Теннистен әйелдер арасындағы әлем чемпионатының екінші жарыс күнінде Қазақстан құрамасы Испаниямен кездесті. Жекелей сында екі рет жеңіліс тапқан Қазақстан командасының жұптық сында да бағы жанған жоқ. Анна Данилина мен Юлия Путинцева Бадоса-Большова жұбынан жеңілді.
Глазгодағы (Ұлыбритания) екінші жарыс күні Данилина-Путинцева - Бадоса-Большова жұптарының матчымен жалғасты. Жұптық сындағы бәсекеде жерлестеріміз испаниялық Паула Бадоса мен Алена Большова дуэтіне амал жасай алмай, 6:4, 6:2 есебіен жеңілді.
Осылайша, Қазақстан құрамасы Испаниядан 3:0 есебімен жеңіліп, С тобынан плей-офф кезеңіне шығу мүмкіндігінен айырылды. Бұл теннистен Қазақстан әйелдер құрамасының Билли Джин Кинг Кубогының финалдық кезеңінде алғаш рет өнер көрсетуі екенін еске сала кетейік.