Қазақстан хоккей федерациясы Ұлттық Спорт университетімен келісімге қол қойды
Азамат Айтхожин және Тұрсынзада Қуанғалиева. Сурет: ҚХФ
Қазақ ұлттық спорт университеті мен Қазақстан хоккей федерациясы ынтымақтастық туралы меморандумға қол қойды, деп хабарлайды BasSport.kz тілшісі Федерацияның баспасөз қызметіне сілтеме жасап.
Құжатқа Университет ректоры Тұрсынзада Қуанғалиева және ҚХФ бас директоры Азамат Айтхожин қол қойды. Келісім қазақстандық хоккейдің кадрлық әлеуетін дамытуға, спорт ғылымының жетістіктерін тәжірибеге енгізуге, сондай-ақ білім беру мен спорт салалары арасындағы өзара байланысты нығайтуға бағытталған. Тараптар білім беру бағдарламаларын бірлесіп іске асыруға, ғылыми зерттеулер ұйымдастыруға, семинарлар, біліктілікті арттыру курстары мен спорттық іс-шаралар өткізуге уағдаласты.
Сонымен қатар студенттік хоккейді дамытуға, волонтерлік қозғалысты қолдауға және білім алушылар үшін кәсіби тәжірибе ұйымдастыруға ерекше көңіл бөлінеді.
"Қазақ ұлттық спорт университетімен меморандумға қол қою – қазақстандық хоккей үшін маңызды стратегиялық қадам. Бүгінде спортты ғылымға және сапалы мамандар даярлауға сүйенбей дамыту мүмкін емес. Біз үшін жаттықтырушыларды, әдіскерлерді, менеджерлерді және сала мамандарын жүйелі түрде даярлау аса маңызды. Федерацияның практикалық тәжірибесі мен Университеттің академиялық базасын біріктіру кадр даярлау сапасын жаңа деңгейге көтереді деп сенемін", – деді Федерация басшысы.
Сонымен қатар, жеке келісім аясында ҚФХ базасында хоккей кафедрасын құру мүмкіндігі қарастырылған. Меморандумға қол қою мамандарды жүйелі даярлауға және Қазақстандағы хоккейдің одан әрі дамуына негіз болады.