«Қазақстанның мақтанышы болды». УЕФА «Қайраттың» тарихи жетістігін атап өтті
KazFootball.kz
УЕФА-ның ресми сайты 2025/26 маусымындағы еурокубок дебютанттарына арналған материалында алматылық «Қайраттың» тарихи табысын ерекше атап өтті, деп хабарлайды Bassport.kz.
Алғаш рет Чемпиондар лигасының жалпы кезеңіне шыққан «Қайрат» Қазақстан футболының тарихында үлкен белеске жетті. UEFA.com сайтында:
«Қайрат Қазақстанның мақтанышы болды. Алматылық клуб ел тарихында Чемпиондар лигасының топтық кезеңіне шыққан екінші команда атанды. Бұл жетістікке олар сейсенбі күні „Селтикті“ пенальти сериясында жеңіп жетті. Квалификациядағы қажырлы еңбегі үшін „Қайрат“ жеребеде мықты қарсыластарға жолықты – Алматыда мадридтік „Реалмен“ ойнаса, сырт алаңда „Интер“ мен „Арсеналға“ қонаққа барады», – деп жазылды.
Жалпы кезеңге «Қайратпен» бірге үш клуб алғаш рет шықты: Норвегияның «Будё-Глимт», Бельгияның «Юнион» және Кипрдің «Пафосы». Айта кетейік, «Пафос» Чемпиондар лигасының негізгі кезеңіне жеткен Кипр тарихындағы үшінші команда болды.
Алдағы негізгі кезеңде «Қайрат» сегіз матч өткізеді: төртеуі – Алматыда, төртеуі – сырт алаңда. Өз алаңындағы қарсыластары – испандық «Реал», бельгиялық «Брюгге», гректің «Олимпиакосы» және кипрлік «Пафос». Сырт алаңдағы кездесулерін команда италиялық «Интерге», ағылшынның «Арсеналына», португалиялық «Спортингке» және даниялық «Копенгагенге» қарсы өткізеді.