«Turkistan Cup – 2024» турнирінде түркістандық команда чемпион атанды
Түркістан облысы әкімінің баспасөз қызметі
Түркістанда 2010, 2012-2013 жылы туған жасөспірімдер арасында футболдан «Turkistan Cup – 2024» республикалық турнирі өтті. Бұл туралы Bassport.kz.
Сайысқа Астана, Ақтау, Тараз, Қонаев, Түркістан, Кентау қалалары мен Алматы облысынан 16 команда қатысты. Спорттық шараға қалалық мәдениет, тілдерді дамыту, дене шынықтыру және спорт бөлімінің басшысы Қадырболат Мұсағалиев пен қалалық мәслихат төрағасы Ғаппар Сәрсенбаев қатысып, еліміздің әр өңірінен келген жас спортшыларға қолдау білдірді.
Ойын қорытындысы бойынша 2010 жылы туған жасөспірімдер арасында «Түркістан» командасына чемпиондық кубок бұйырды. II орынды «Қонаев» командасы, III орынды «Каспий» командасы иеленді.
Ал 2012-2013 жылы туған жасөспірімдер арасындағы чемпиондық кубокты Түркістан қаласының «Балалар мен жасөспірімдер спорт клубының» командасы қанжығаға байласа, II орынды «Тұран Түркістан» командасы, III орынды түркістандық БЖМОФМ мектебі еншіледі. Үздік ойыншыларға арнайы номинациялар табысталды.