Түркістанда волейболдан О.Жарылқаповты еске алуға арналған турнир басталды
«Түркістан – Түркі әлемінің туризм астанасы» жобасы аясында Түркістанда КСРО-ға еңбек сіңірген жаттықтырушы, қазақ волейболының тұңғыш спорт шебері Октябрь Жарылқаповты еске алуға арналған жасөспірімдер арасындағы волейболдан ашық біріншілік басталды.
Жарысқа Ақтөбе, Қызылорда, Қарағанды, Жамбыл және Түркістан облыстарынан келген 2008-2009 жылы туған және одан кіші волейболшылар қатысуда. Барлығы 9 команда, 126 жас спортшы жарыс жолына шықты.
Октябрь Қыдырбайұлы – қазақтан шыққан тұңғыш «КСРО спорт шебері» атағын алған волейболшы. Ол Одақтың үздік 24 спортшысының қатарына енген және өмірін ұлттық волейболды дамытуға арнаған ерекше жан.
Жарыс аясында қатысушылар спорттық шеберліктерін шыңдап қана қоймай, бір-бірімен тәжірибе алмасуға мүмкіндік алады. Біріншілік алдағы күндері өз жалғасын табады.