Садраддин Ахметов жеңісінен кейін марқұм Шерзат Болат туралы айтты
Бокс
1bol
Кәсіпқой бокста орта салмақта өнер көрсететін қазақстандық Садриддин Ахмедов (15-0, 12 KO) бүгін кезекті жеңісіне қол жеткізді. Ол жекпе-жектен кейін бұл жеңісін қазақ еліне арнайтынын айтып, Талғарда қаза тапқан Шерзат Болат туралы да ойын ортаға салды, деп хабарлайды BasSport.kz 1bol-ға сілтеме жасап.
«Бұл жеңісіммен барша қазақ елін 16 желтоқсан – Тәуелсіздік күнімен құттықтаймын. Сондай-ақ, Қазақстанда көп жағдай болып жатқанын жақсы білесіздер. Соның бірі – Шерзатқа байланысты жағдай. Шетелде жүрсек те, оның бәрі жүрегімізге батады. Еліміздің көк туын осындай ареналарда көтеру – біз үшін үлкен мәртебе. Қазақ елі, сіздерді қатты жақсы көремін. Осы жеңісімді қазақ еліне арнағым келеді», - деді Садриддин Ахмедов.
Айта кетейік, отандасымыз бүгін АҚШ-тың Санта-Инез қаласында өткен Hollywood Fight Nights бокс кешінде америкалық боксшы Рафаэль Игбоквемен (17-6, 7 КО) жұдырықтасты. Жекпе-жек жетінші раундта Садриддиннің нокаутымен аяқталды. Ахмедов-Игбокве бәсекесі әйгілі қазақстандық Геннадий Головкинмен ұзақ уақыт бірге жұмыс істеген промоутер Том Леффлердің 360 Promotions шоуы аясында өтті.